Tribunal Constitucional de Espana

Mazazu del Tribunal Constitucional a la estrema derecha n’Asturies

El supremu intérprete de la Constitución Española torna'l recursu d'inconstitucionalidá interpuestu por VOX que pretendía censurar l'usu del asturianu na Xunta Xeneral del Principáu d'Asturies

El Tribunal Constitucional fixo pública, ayeri xueves, la sentencia que pon fin al intentu de censura de la ultraderecha nel Principáu d’Asturies. Trátase d’una sentencia con un marcáu calter históricu, pues esta ye la primer vegada que se explicita l’amparu constitucional a la protección d’un patrimoniu inmaterial asturianu como ye una de les sos llingües propies, y tamién pola condición qu’adquier como cortafueos constitucional frente a los propósitos de censura de la formación d’estrema derecha n’Asturies.

Nesta sentencia, recoyida nun documentu de 17 páxines, el Plenu del intérprete supremu de la Constitución remana los argumentos polos que respuende por l’usu del asturianu na Xunta Xeneral frente al recursu d’inconstitucionalidá númberu 4911-2020 presentáu ante’l TC polos parllamentarios del partíu d’estrema derecha nel Congresu de los Diputaos.

La sentencia establez que’l reglamentu “nun reconoz nin a l’Alministración autonómica, nin a los entes locales, nin a los órganos dependientes de l’Alministración central, porque namás queda circunscrito al ámbitu de la mesma Cámara autonómica”.

Lloñe de les pretensiones de la ultraderecha, la sentencia señala que les midíes de protección y promoción, como ye “la reconocencia del usu de la llingua mesmu ante l’órganu de representación de la ciudadanía, la Xunta Xeneral del Principáu”, son “especialmente afeches pa garantizar y visibilizar aquella realidá llingüística plural”. La sentencia establez amás qu’esi usu en see parlamentaria ta amparáu pela Carta Europea de les llingües rexonales o minoritaries.

  El documentu avala por tantu l’usu de la llingua propia tanto polos diputaos nel exerciciu de les sos funciones parlamentaries como polos miembros del Conseyu de Gobiernu, los cargos y emplegaos o cualquier persona que compareza ante la Cámara autonómica. El testu esclaria que la falta d’oficialidá nun esclúi la posibilidá de “tutelar” esta realidá llingüística” nel Parlamentu.

Llee equí la sentencia completa

Share on facebook
Facebook
Share on twitter
Twitter
Share on google
Google+